2. எதிரொளிப்பின் வகைகள்

அனைத்துப் பொருள்களும் ஒளியை எதிரொளிப்பதில்லை என்பதனை நாம் பயின்றுள்ளோம். ஒளி எதிரொளிக்கும் அளவானது எதிரொளிக்கும் பொருளின் பரப்பைச் சார்ந்தது. எதிரொளிக்கும் பரப்பின் தன்மையைப் பொருத்து எதிரொளித்தலை இரண்டாக நாம் வகைப்படுத்தலாம். அவை:

ஒழுங்கான எதிரொளிப்பு:

ஓர் ஒளிக்கற்றையானது (இணை ஒளிக்கதிர்களின் தொகுப்பு) வழவழப்பான பரப்பின் மீது விழும் போது அது எதிரொளிக்கப்படுகிறது. எதிரொளிப்பிற்குப் பின் ஒளிக்கதிர்கள் ஒன்றுக்கொன்று இணையாக இருக்கும்.

 

 

இந்த எதிரொளிப்பில் ஒவ்வொரு ஒளிக்கதிரின் படுகோணமும் எதிரொளிப்புக் கோணமும் சமமாக இருக்கும்.

 

  

இதில் எதிரொளித்தல் விதி பின்பற்றப்படுவதால், தெளிவான பிம்பம் கிடைக்கிறது. இவ்வகை எதிரொளிப்பு ’ஒழுங்கான எதிரொளிப்பு’ அல்லது ’கண்ணாடி எதிரொளிப்பு’ எனப்படும்.

 

ஒழுங்கற்ற எதிரொளிப்பு:

பொருளானது சொரசொரப்பான அல்லது ஒழுங்கற்ற பரப்பைக் கொண்டிருக்கும் போது, அப்பரப்பின் ஒவ்வொரு பகுதியும் வெவ்வேறு கோணத்தில் அமைந்திருக்கும்.

 

ஒளியானது அத்தகைய பரப்பின் மீது விழும் போது ஒவ்வொரு ஒளிக்கதிரும் வெவ்வேறு கோணத்தில் எதிரொளிக்கின்றன.

 

 

இங்கு ஒவ்வொரு ஒளிக்கதிரின் படுகோணமும், எதிரொளிப்புக் கோணமும் சமமாக இருக்காது. ஒளி எதிரொளிப்பு விதிகள் இதில் பின்பற்றப்படாததால் தெளிவான பிம்பம் கிடைப்பதில்லை. இத்தகைய எதிரொளிப்பு ’ஒழுங்கற்ற எதிரொளிப்பு’ அல்லது ’விரவலான எதிரொளிப்பு’ எனப்படும்.