3. கவிதை முழுபடைப்பு

பாரதியின் கவிதைப் படைப்பு - காணி நிலம் முழுக் கவிதை :

காணி நிலம் வேண்டும் - பராசக்தி
          காணி நிலம் வேண்டும்; – அங்குத்
தூணில் அழகியதாய் – நன்மாடங்கள்
        துய்ய நிறத்தினதாய் – அந்தக்
காணி நிலத்திடையே – ஓர் மாளிகை
      கட்டித் தரவேண்டும்; – அங்குக்
கேணி அருகினிலே– தென்னைமரம்
      கீற்று மிள நீரும்.

 

பத்துப் பன்னிரண்டு – தென்னைமரம்
      பக்கத்திலே வேணும் – நல்ல
முத்துச் சுடர்போலே– நிலாவொளி
     முன்பு வர வேணும்; – அங்கு,
கத்துங் குயிலோசை– சற்றேவந்து
     காதில் படவேணும்; – என்றன்
சித்தம் மகிழ்ந்திடவே– நன்றாயிளந்
     தென்றல்வர வேணும்.

 

பாட்டுக் கலந்திடவே-அங்கேயொரு
       பத்தினிப் பெண்வேணும்; - எங்கள்
கூட்டுக் களியினிலே - கவிதைகள்
       கொண்டுதர வேணும்; - அந்தக்
காட்டு வெளியினிலே, - அம்மா! நின்றன்
       காவலுற வேணும்; - என்றன்
பாட்டுத் திறத்தாலே - இவ்வையத்தைப்
       பாலித்திட வேணும்.